Abigaïl Alexandre pral reprezante Ayiti nan final konkou Eloquentia International

Yon nouvo paj enpòtan ap ekri pou Ayiti sou plan entènasyonal la. Jèn talan ayisyèn Abigaïl Alexandre ap prepare pou defann koulè peyi a nan gran final konkou prestijye Eloquentia International, ki ap dewoule mèkredi 25 mas 2026 lan nan peyi Lafrans.

Final la ap fèt nan La Seine Musicale, yon sal modèn ki ka resevwa plis pase 3 500 moun. Yon sèn enpòtan kote pawòl vin tounen zouti enfliyans, lidèchip ak transfòmasyon.

A 21 ane sèlman, Abigaïl Alexandre pa sèlman reprezante yon jenerasyon jèn ki gen talan, men li pote tou espwa yon nasyon antye. Apre li te ranpòte dezyèm edisyon Eloquentia Jacmel an 2025, li make listwa kòm premye Ayisyèn ki rive nan nivo sa a depi kreyasyon konpetisyon entènasyonal la nan lane 2012.

Nan yon mesaj mobilizasyon, li lanse yon apèl klè bay dyaspora ayisyèn ki an Frans pou vin sipòte li an kantite. Paske nan etap final sa a, chak vòt konte, chak prezans gen pwa, chak vwa ka fè diferans.

Patisipasyon li depase yon senp konkou diskou. Se yon demonstrasyon kapasite jèn ayisyen yo pou briye sou sèn mondyal la, pou pote ide, pou defann vizyon, epi pou enspire lòt jenerasyon.

Nan yon epòk kote imaj Ayiti souvan asosye ak kritik, prezans Abigaïl Alexandre nan yon konkou konsa se yon rapèl fò: peyi a gen resous ekstraòdinè, malgre jan sa ye.

Randevou a fikse. Kounye a, kesyon an senp: èske dyaspora a ap reponn prezan pou sipòte youn nan pi bèl vwa Ayiti genyen jodi a?