Nan yon moman kote lòt tandans mizikal yo ap chanje e RAP souvan pèdi plas li, Broadcast Mizik parèt kòm yon limyè espwa. Medya kiltirèl sa a lanse pwojè REVEYE BLÒK, yon inisyativ ki vize soutni mouvman RAP la, mete talan kache yo an valè, epi enspire jenerasyon k ap vini yo.
Pou ekip Broadcast Mizik, objektif la klè : kreye yon pon mizikal ant atis ayisyen yo ak fanatik yo k ap viv sou tout latè. “Nou vle konbine talan ak reyalite nou menm Ayisyen. RAP la se vwa blòk la, e blòk la se imaj sosyete nou,” esplike Ricardo Jean Baptiste, direktè atistik ak kowòdonatè adjwen nan estrikti a.
Pou rive atenn vizyon sa a, Broadcast Mizik mete sou pye Tchalendj REVEYE BLÒK, yon platfòm dekouvèt ki bay rapè ki sòti nan zòn defavorize yo opòtinite pou yo eksprime tèt yo. “Reveye Blòk se pa sèlman yon konpetisyon, se yon pwojektè sou tèt tout jèn k ap lite pou yo parèt,” ajoute Delia Jhonny, kowòdonatè jeneral la.
Ane 2025 la, tchalendj lan pote tèm REPARASYON, yon chwa ki pote anpil sans nan yon peyi k ap fè fas ak gwo kriz sosyal ak ensekirite. Dapre òganizatè yo, tèm sa a reflete bezwen pèp la pou jistis istorik ak sosyal. “Depi 1825, lè koloni fransè yo te fòse Ayiti peye pou endepandans li, nou ap viv ak konsekans yo. Nou mande reparasyon pou peyi a, pou fanmi ki pèdi tout bagay nan ensekirite, e pou RAP la tou, ki merite jwenn valè li ankò,” esplike ekip la.
Konpetisyon an lanse ofisyèlman 20 oktòb sou chanèl YouTube Broadcast Mizik, ak 12 patisipan ki sòti nan plizyè komin. Chak atis envite a pwodui yon tèks ki tradui lavi l, obsèvasyon l sou chomay, lamizè, ak inegalite blòk li ap viv ladan l. Ane pase, 14 rapè te patisipe nan menm eksperyans lan, e tradisyon an kontinye.
Pou detèmine twa gayan yo, Broadcast Mizik tabli de kritè : 30 pwen ap sòti nan kantite vyouz patisipan an ranmase sou YouTube, tandiske 70 pwen ap baze sou analiz tèks yo ak pèfòmans yo.
Avèk REVEYE BLÒK, Broadcast Mizik vle montre ke RAP la toujou vivan, ke li se vwa pèp la, ak yon zouti pou chanje sosyete a. “Se pa sèlman yon konpetisyon, se yon mouvman, yon apèl pou reparasyon nan kilti ak nan lavi chak jou nou,” konklizyon Ricardo Jean Baptiste ak Delia Jhonny.
